Nakumpiska ang Police Regional Office 12 ukon PRO 12 ang masobra sa ₱7.13 milyon sang ginapatihan nga illegal drugs sa nagkalain-lain nga operasyon sa SOCCSKSARGEN sa bulan sang Agosto 2026.
Suno sa PRO 12, 192 ka drug personalities ang nadakpan, lakip ang 28 ka High-Value Individuals kag 164 ka Street-Level Individuals. Masobra sa 1,063 gramos sang ginapatihan nga illegal drugs ang narekober, nga ginalakipan sang shabu kag marijuana.
Ginpalig-on man sang kapulisan ang kampanya batok sa smuggled cigarettes. Sa 845 ka operasyon, 521 ka indibidwal ang nadakpan kag yara sa 18,201 ka reams sang sigarilyo nga nagabalor sang halos ₱15.58 milyon ang nakumpiska.
Samtang, 492 ka armas, explosives kag ammunition ang narekober sa 199 ka operasyon batok sa loose firearms, samtang 30 ka indibidwal ang nadakpan. Sa kampanya naman batok sa mga wanted persons, 390 ka indibidwal ang nadakpan, lakip ang 100 Most Wanted Persons.
Suno kay PRO 12 Regional Director PBGEN Alan B. Manibog, ang mga resulta sang operasyon bunga sang disiplina, pagbinuligay kag padayon nga pagpatigayon sang kampanya para sa kalinungan kag seguridad sa SOCCSKSARGEN.
Photo Courtesy: PNP Police Regional Office 12
