Arestado sang Tacurong City Police Station ang isa ka ginakabig nga High-Value Individual ukon HVI sa isa ka buy-bust operation sa Barangay Buenaflor, Tacurong City, sang gab-i sang September 2, 2026.
Ang suspetsado ginkilala sa alyas nga “Dublas,” 36 anyos, isa ka driver kag residente sang Barangay Buenaflor, kag gin-identify sang PDEA Region 12 bilang High-Value Individual.
Narekober sa operasyon ang 15.73 gramos sang ginapatihan nga shabu nga nagabalor sang P106,964.00. Lakip sa nakumpiska ang isa ka sachet nga may yara sang 1.87 gramos halin sa buy-bust transaction, kag duha pa ka sachet nga may kabug-aton nga 13.86 gramos nga narekober sa possession sang suspetsado. Narekober man ang cellphone, coin purse kag buy-bust money nga P1,000.00.
Ang suspetsado kag mga ebidensya yara na sa kustodiya sang Tacurong City Police Station para sa nagakaigo nga disposisyon kag pagsaka sang kaso sa paglapas sa Republic Act 9165 ukon Comprehensive Dangerous Drugs Act of 2002.
Suno kay PRO 12 Regional Director PBGEN Alan B. Manibog, padayon ang kampanya sang kapulisan batok sa ilegal nga droga agud maprotektahan ang komunidad kag mapabilin nga hilway kag malinong ang SOCCSKSARGEN.
Photo Courtesy: PNP Police Regional Office 12
