Gisugdan na sa MTerra Solar Phase 1 ang komersyal nga operasyon niadtong Agosto 26, human maaprobahan sa National Grid Corporation of the Philippines (NGCP) ang koneksyon niini sa national grid.
Ang proyekto makahatag og 600 megawatts alternating current (MWac) nga mid-merit capacity ubos sa kasamtangang power supply agreement niini sa Manila Electric Company (Meralco).
Gihatag sa NGCP ang Final Certificate of Approval to Connect (FCATC) human mapasar sa proyekto ang tanang kinahanglanon alang sa luwas ug kasaligan nga operasyon sa 950 MWac nga solar capacity ug 825 MW nga battery energy storage system.
Giingon sa Meralco PowerGen Corp. (MGen) nga ang MTerra Solar mao na karon ang pinakadakong operational integrated solar ug battery facility sa kalibotan.
Giinagurar ni Presidente Ferdinand R. Marcos Jr. ang proyekto niadtong Hulyo 14, diin gi-energize ang 1,373 MWac nga solar PV capacity ug 825 MW o 3,300 MWh nga battery storage system.
Matod ni MGen ug MTerra Solar President ug CEO Dennis Jordan, nagpakita ang proyekto nga posible ang pagpalambo sa renewable energy sa dako nga sukod samtang gisiguro ang kaluwasan ug kasaligan sa national grid.
Gipasalamatan usab niya ang mga empleyado, investors, NGCP, Department of Energy (DOE), ug Energy Regulatory Commission (ERC) sa ilang koordinasyon sa pagpatuman sa proyekto.
Photo Courtesy: iTech Solution
