Padayon ang paningkamot sa Provincial Government of Zamboanga del Norte (PGZDN) sa pagpalapad sa mga serbisyo ug programa alang sa mga senior citizens, lakip ang panglawas, social participation, livelihood, mga benepisyo ug social welfare.
Mao kini ang tumong atol sa 3rd Quarter Meeting sa Elderly Welfare Program nga gipahigayon kagahapong adlawa, September 2, didto sa Ground Floor, Plenary Hall sa Zamboanga del Norte Convention and Exhibition Center (ZNCEC).
Si Social Welfare Assistant Katrina Raneses mipadayag nga ang mga senior citizens usa sa mga bililhong bahandi sa katilingban tungod sa ilang daghang kasinatian ug kaalam, nga mahimo nilang ipaambit isip giya ug ehemplo sa mga batan-on.
Usa sa gihisgutan sa maong meeting mao ang mga amendments sa Constitution and By-Laws sa Federation of Senior Citizens Association of the Philippines-Zamboanga del Norte Chapter (FSCAP-ZDN), lakip ang mga probisyon bahin sa membership, organizational structure, responsibilidad sa mga opisyal ug financial management.
Gitumong sa maong amendments nga mas mapauswag ang organisasyon sa mga senior citizens ug mas mahimong hapsay ug epektibo ang pagrepresentar sa ilang mga tingog sa mga konsultasyon uban sa mga local government units (LGUs) ug ubang ahensya sa gobyerno.
Courtesy: Provincial News network
