Sugdan sa Sugbo ang 2026-27 season sa East Asia Super League (EASL) pinaagi sa usa ka marquee double-header karung Oktubre 3 sa bag-ong SM Seaside Arena Cebu. Kini usab ang unang professional basketball games nga ipahigayon sa maong bag-ong arena.
Mag-atbang sa unang duwa ang Macau Hou Chon ug Taipei Fubon Braves, samtang sa main game mag-atbang ang reigning Maharlika Pilipinas Basketball League (MPBL) champion Abra Solid North Weavers ug Hong Kong Eastern.
Mahimo usab nga makasulat og kasaysayan ang Abra Weavers isip unang MPBL club nga makigkompetensya sa EASL , human makakuha og puwesto sa regional competition pinaagi sa ilang championship run.
Kasamtangang nagkupot sa top seed sa MPBL ang Abra nga maoy modala sa bandera sa Pilipinas batok sa Hong Kong Eastern. Matud ni EASL CEO Henry Kerins, ang pagsugod sa season sa Cebu usa ka dakong lakang alang sa liga, ilabi na sa pagpausbaw sa kalidad sa kompetisyon, fan experience, storytelling ug production.
Welcome usab sa MPBL founder ug walo ka division world boxing champion nga si Manny Pacquiao ang oportunidad alang sa Abra Weavers nga magbukas sa EASL season atubangan sa mga Filipino basketball fans.
Photo courtesy: www.chosun.com
