Gipasiugda sa san carlos city ang malungtarong fashion industry pinaagi sa “sustainable urban smartwear workshop” nga gitapos niadtong agosto 31 sa annex building, San Carlos City. Gipakita sa 11 ka lokal nga designers ang ilang mga nahimo nga sustainable fashion pieces, lakip ang mga costume, accessories ug bag, nga gisul-ob sa unom ka mga modelo.
Gigamit sa mga partisipante ang lokal ug eco-friendly nga materyales sama sa abaca fiber, shells ug Hablon, usa ka tradisyonal nga hinabol nga tela. Ang ilang mga obra ipakita usab sa Negros Trade Fair karong tuiga.
Matud ni LEDIP (Local Economic Development and Investment Promotion) Special Operations Officer III Ma. Novah R. Sollesta, dili lang sinina ang mga nahimong produkto, kundili nagrepresentar usab kini sa kultura ug identidad sa San Carlos City, ilabina isip siyudad nga nagpalambo sa innovation ug eco-design.
Gilauman sa lokal nga pangagamhanan nga mapalambo pa ang maong inisyatibo ngadto sa malungtarong panginabuhian sa komunidad. Gihatagan usab ni Mayor Renato Y. Gustilo og feedback ang mga produkto ug gipasiugda ang importansya sa pag-andam sa produksiyon kung mosaka ang panginahanglan sa mga sustainable fashion items.
Photo Courtesy: SAN CARLOS LGU NEG.OCC PIO
