Nagpadala ang Philippine Army sang ikalima nga wave sang dugang nga pwersa sa Lanao del Sur bilang kabahin sang pagpanghanda para sa September 14, 2026, una nga Bangsamoro Parliamentary Elections.
Duha ka dugang nga Provisional Battalions ang ginpadala halin sa Camp Cesar L. Sang-an sa Labangan sang Agosto 31, 2026. Lakip sa reinforcement ang All-Female Hijab Company, nga maghatag sang espesyal nga female security component, ilabi na sa mga komunidad nga may Muslim nga kultura kag tradisyon.
Samtang, may yara na sang walo ka Infantry Battalions nga nakadeploy sa probinsya, kag ginalauman man ang pag-abot sang 3rd Special Forces Battalion antes sang eleksyon. Nagasuporta man ang Armor kag Field Artillery Units sa security preparations.
Suno kay Maj. Gen. Yegor Rey P. Barroquillo Jr., Commander sang 1st Infantry Division, kinahanglan nga magpabilin nga propesyonal, disiplinado kag neutral sa politika ang mga sundalo.
Ginpahanumdom niya nga ang katuyuan sang deployment amo ang paghatag sang hilway, malinong kag luwas nga palibot agud ang mga botante makagamit sang ila demokratiko nga katungdanan nga wala sang kahadlok ukon pagpanghadlok.
Magakoordinar ang Philippine Army sa PNP, COMELEC kag iban pa nga ahensya para sa seguridad antes, sa tion kag pagkatapos sang eleksyon.
Photo Courtesy: 1st Infantry Tabak Division Philippine Army
