Arestado sang Joint Police Operatives ang isa ka wanted person sa Barangay Poblacion, Palimbang, Sultan Kudarat, pasado alas nuwebe sang gab-i sang Agosto 30, 2026. Ang operasyon ginpangunahan sang Palimbang Municipal Police Station, sa koordinasyon sang 2nd Sultan Kudarat Provincial Mobile Force Company.
Nadakpan ang 36-anyos nga mangingisda nga ginkilala sa alyas nga “Sais,” residente sang Barangay Kiponget, Palimbang. Ang pag-aresto ginpatuman pinaagi sa bench warrant of arrest nga gin-isyu sang Regional Trial Court sa Isulan, Sultan Kudarat, bangud sa kaso nga Robbery in Band, ukon pagpang-holdup nga ginahimo sang grupo, sa idalom sang Article 296 sang Revised Penal Code.
Samtang, may ginrekomendar nga piyansa nga nagabalor sang P40,000.00. Suno kay PRO 12 Regional Director Police Brigadier General Alan Manibog, ang kada pag-aresto sa wanted person isa ka tikang sa pagpatuman sang kasuguan kag paghatag sang hustisya.
Photo Courtesy: PNP Police Regional Office 12
