Mikunhod ang ihap sa mga kaso sa child labor nga natala sa nasud ning kasamtangang tuig, base sa datos nga gipaambit sa Department of Labor and Employment (DOLE) Region IX.
Matud ni DOLE 9 Regional Director Albert Gutib, positibo ang resulta sa mga intervention sa ahensya nga nakatabang sa pagpaubos sa mga kaso sa child labor o mga batang napugos sa pagtrabaho sa sayong pangidaron.
Segun ni RD Gutib, nagpakita lang kini nga epektibo ang mga lakang ug programa sa gobyerno nga nakatabang sa pagpanalipod sa mga kabataan batok sa pagpahimulos sa trabaho nga dili angayan alang sa ilang pangidaron.
Gipahinumdoman usab ni RD Gutib ang mga ginikanan, komunidad ug mga employers nga ang mga kabataan kinahanglan mapanalipdan batok sa peligroso ug makadaot nga trabaho.
Gidasig usab niya ang publiko nga motabang sa pag-report sa mga kaso sa child labor ngadto sa mga otoridadad aron masiguro nga ang mga kabataan makapadayon sa ilang pag-eskwela ug makatagamtam ug maayong kinabuhi.
