Pito ka mga indibidwal ang nakumpirma nga nakabsan sa kinabuhi human nibangga ang usa ka Hi-ace van tali sa usa ka panel truck sa may National Highway, Barangay Paglaum, Dumalinao, Zamboanga del Sur, mga alas 12 kapin sa udto, adlawng Martes, Septyembre 01, 2026.
Duha sa nakabsan sa kinabuhi residente sa lungsod sa Dumalinao, Zamboanga del Sur nga giila sa mga pangalang Julcimil, hingkod ang panuigon, residente sa Barangay Tina, usa ka nagngalang Elizabeth, babaye, ug residente sab Barangay Upper Dumalinao.
Lakip sa mga namatay ang nagngalang Nelson, residente sa Barangay Taytay, Manubo, Naga, Zamboanga Sibugay ug ang driver sa Van nga giilang si Fredjie Patoc Sr. hingkod ang panuigon ug residente sa Zamboanga Sibugay ug ang laing tulo nga wala pa gihinganlan sa kapulisan.
Gikan matud pa ang maong HI-ACE van nga adunay plate number NDX 4479 sa Ipil, Zamboanga Sibugay ug nagbyahe paingon sa syudad sa Pagadian.
Gikataho nga nawad-an ug kontrol ang driver sa van hinungdan nibangga kini sa usa ka nagparking nga panel truck sa maong lugar hinungdan sa grabeng naangkon nga kadaut.
Tungod sa kakusog sa impact, naapil usab ang usa ka Honda Beat nga motorsiklo ug usa ka payong-payong.
Dugang pa, 13 usab ka indibidwal ang padayon nga ginatambalan sa nagkadaiyang tambalanan sa syudad tungod sa mga samad nga ilang naangkon gumikan sa panghitabo
Padayon karon ang imbestigasyon sa Dumalinao Municipal Police Station aron masuta ang eksaktong hinungdan sa makalilisang nga aksidente.
