Nakadawat og flexible irrigation hoses ang 198 ka mga miyembro sa Farmers ug Irrigators Associations sa Davao de Oro atol sa turn-over ceremony niadtong Setyembre 1. Ang matag benepisyaryo gihatagan og 4-inch x 100-meter nga irrigation hose, nga gitumong aron madugangan ang ilang tinubdan sa tubig alang sa mga tanom.
Gikan sa mga lungsod sa Compostela, Montevista, New Bataan, Maragusan, Monkayo, Laak, Mawab ug Nabunturan ang mga benepisyaryo. Matud ni Governor Raul Mabanglo, ang maong assistance gikan sa Department of Agriculture ug resulta sa paningkamot sa provincial government nga mapalambo ang suporta alang sa mga mag-uuma.
Gipasalamatan usab sa mga benepisyaryo ang dugang nga kagamitan, ilabina sa pagsagubang sa grabeng kainit ug kakulang sa tubig sa uma.
