Balik normal na ang FACE-TO-FACE classes sa mga estudyante sa tanang pampubliko ug pribadong eskwelahan sa lungsod sa San Miguel, Surigao del Sur sugod Septyembre 1, 2026. Kini human nga gitapos na ang temporaryong pag-usab sa class schedule nga gipatuman tungod sa grabeng kainit sa panahon.
Base sa Executive Order No. 080, Series of 2026, gibawi na ang modified face-to-face class schedule tungod kay miarang-arang na ang kahimtang sa panahon.
Busa, sugod Septyembre 1, mobalik na ang mga estudyante sa ilang regular nga face-to-face classes ug sa naandan nga class schedule. Apan bisan pa man sa pagbalik sa regular nga klase, gipahinumdoman gihapon ang mga eskwelahan nga ipadayon ang hustong health ug safety measures aron mapanalipdan ang mga estudyante, magtutudlo ug school personnel.
Giawhag usab ang mga ginikanan ug estudyante nga magpadayon sa pag-amping ug pag-monitor sa kahimtang sa panahon, ilabina kon mosaka pag-usab ang temperatura.
Photo courtesy: LGU San Miguel
