Gipahugtan sa Department of Migrant Workers (DMW) Caraga ang kampanya batok sa illegal recruitment, online scams ug labor trafficking, ilabina batok sa mga pumuluyo nga nangitag trabaho sa gawas sa nasud.
Tumong sa kampanya nga mapanalipdan ang mga aplikante ug mga nagtinguha nga mahimong Overseas Filipino Workers (OFWs) batok sa pagpangilad ug pagpahimulos sa mga illegal recruiter.
Gipahinumdoman sa DMW ang tanang gustong mangtrabaho sa gawas sa nasud nga sundon kanunay ang “APAT DAPAT” nga mga sumbanan aron masiguro nga legal ug luwas ang ilang pagtrabaho abroad.
Sumala sa DMW, ang mga illegal recruiter mahimong pasakaan og kaso ubos sa mga balaod sa Pilipinas batok sa human trafficking.
Tambag usab ni DMW Assistant Secretary Jerome Alcantara sa mga nangandoy nga mahimong OFW nga makig-alayon una sa pinakaduol nga DMW Regional Office aron makakuha og hustong impormasyon ug malikayan ang mga scam ug illegal recruitment.
Gipahinumdoman usab ang publiko nga dili basta-basta motuo sa mga job offer nga makita sa social media, ilabina kung mangayo og kwarta o personal nga impormasyon ang nagpakilalang recruiter.
