Nadakpan ang usa ka lalaki nga namaligya sa drogang shabu sa hiniusang pwersa sa kapulisan sa pagpanguna sa Philippine Drug Enforcement Agency o PDEA Regional Office 10, lakip ang Lanao del Norte Provincial Office, Special Intelligence Unit Lanao Alpha, ug operating team gikan sa Misamis Occidental atol sa gikasang buy-bust operation sa may alas 12:25 sa udto, niadtong Biyernes, Oktubre 9, sa Tambo, Barangay Hinaplanon, Iligan City.
Giila ang dinakpan nga si alyas Sultan, 33 anyos, minyo, walay trabaho ug residente sa Marawi City, Lanao del Sur. Subay sa report, narekober sa nahimutang sa suspek ang tulo (3) ka plastic sachet sa gidudahang shabu nga naglangkob sa usa (1) ka dako nga pakete nga nitimbang sa 400 gramo nga nagkantidad og 2.72 milyong pesos samtang ang gitaho nga street value niini gibana-bana sa 800 mil pesos.
Narekober sab sa mga operatiba ang usa ka itom nga mini bag, cellphone, paper bag, ug usa ka tinuod nga 1,000 pesos nga papel nga gigamit isip marked money.
Sa pagkakaron, posibleng atubangon sa suspek ang kasong paglapas sa Section 5 sa Republic Act 9165 o Comprehensive Dangerous Drugs Act of 2002.
