Kapin ₱13.9 milyon nga mga interbensyon ang gipagawas na sa Department of Agriculture in Caraga (DA-13) hangtod Agosto aron mapalig-on ang National Urban and Peri-Urban Agriculture Program (NUPAP), usa ka programa nga nagtumong sa pagpalig-on sa food security ug malungtarong pagpanguma sa mga siyudad ug lungsod. Sumala sa datos sa ahensya, ang tabang gihatag ngadto sa mga partner ug cooperative gikan sa pribadong sektor, nagkalain-laing ahensya sa gobyerno, public schools, state colleges and universities, ug local government units (LGUs).
Lakip sa mga gipanghatag ang mga liso, abono, gamit sa pagpanguma, ug mga production facilities sama sa greenhouse, nursery ug demonstration sites. Gitukod ang NUPAP pinaagi sa Administrative Order No. 03, Series of 2022 ug giila kini isip usa sa mga flagship program sa Department of Agriculture.
Tumong sa DA nga masiguro ang pagkaon sa mga komunidad sa urban ug peri-urban areas, maminusan ang gasto sa gasolina pinaagi sa pagpamubo sa gilay-on sa pagbiyahe sa mga produkto sa pagkaon, makamugna og panginabuhian ug mapalambo ang mas himsog nga estilo sa kinabuhi pinaagi sa mas sayon nga access sa masustansyang pagkaon. Lakip sa mga produkto nga sakop sa programa ang mga utanon, prutas, ornamental plants, uhong, gagmayng kahayupan, aquaculture, hydroponics ug vertical gardens.
Sa Bislig City, Surigao del Sur, upat ka elementary schools ug usa ka high school ang nakiglambigit sa programa pinaagi sa “Gulayan sa Paaralan” initiative. Samtang, 20 ka barangay sa Surigao del Norte ug tulo ka barangay sa Agusan del Sur ang apil usab sa implementasyon sa NUPAP.
Lakip sa mga proyekto nga gipondohan mao ang ₱4.5 milyon nga smart greenhouse sa Caraga State University, ₱4.7 milyon nga greenhouse sa Agusan del Sur State College of Agriculture and Technology, ug ₱4.7 milyon nga mushroom facility sa Agusan del Sur State University.
Gidasig ni Marco Antonio Morido, DA-13 Regional Technical Director for Research and Regulation, ang mga residente ug mga asosasyon nga moduol sa ilang Municipal Agriculture Office (MAO) aron makapangutana ug maka-apply sa pag-apil sa programa.
Photo courtesy: PNA
