Mikabat na sa 92 ka benepisyaryo sa Caraga Region ang natabangan sa ‘Pag-abot Program’ sa Department of Social Welfare and Development (DSWD) hangtod Hulyo, diin 83 niini ang na-reintegrate na sa ilang mga komunidad ug nakadawat og ayuda.
Sumala ni DSWD-13 Program Information Officer Ebrahim Malazarte, ang mga benepisyaryo mga residente sa Caraga nga nangadto sa ubang lugar, kasagaran sa Metro Manila, aron mangita og oportunidad sa trabaho apan sa ulahi napadpad ug nagpuyo sa kadalanan.
Kapin ₱1.06 milyon na ang kinatibuk-ang ayuda nga gihatag sa 83 ka benepisyaryo hangtod niaging bulan. Base sa datos sa DSWD-13, ₱479,250 niini ang gigahin alang sa livelihood assistance, samtang ₱462,000 ang gigamit alang sa transitory shelters. Aduna usab ₱50,000 alang sa transportation ug relocation assistance, ₱40,000 alang sa medical support, ₱20,000 alang sa financial assistance, ug ₱10,000 alang sa psychological support.
Matud sa DSWD-13, pinaagi sa rights-based, humane ug people-centered approach, padayon ang ‘Pag-abot Program’ sa pag-abot sa mga indibidwal nga nagpuyo sa kadalanan, pagtubag sa ilang mga panginahanglanon ug pagtabang sa ilang luwas nga pagpauli ug pag-reintegrate ngadto sa ilang pamilya ug komunidad.
Gipasiugda usab sa ahensya nga ang maong kalampusan nagpakita sa padayong implementasyon sa programa sa Caraga, uban sa koordinasyon sa mga local government units (LGUs) ug uban pang concerned government agencies.
Photo courtesy: DSWD-13
