Nakigtagbo si Municipal Mayor Ramses Troy Olegario kang Cabinet Secretary Benjamin Abalos Jr. sa Malacañang Palace sa Manila niadtong nakalabay nga adlaw, aron hisgutan ang kahimtang ug mga nag-unang panginahanglan sa lungsod sa Ipil, Zamboanga Sibugay.
Atol sa maong panagtagbo, gipresentar ni Mayor Olegario ang mga prayoridad sa lokal nga panggamhanan ug nangayo og suporta gikan sa National Government, ilabina sa pagpalig-on sa serbisyong panglawas ug pagpauswag sa mga proyektong pang-imprastraktura.
Lakip sa mga gihatagan og pagtagad ang pagpaayo sa mga dalan ug konektibidad sa mga barangay nga layo sa sentro sa lungsod. Pinaagi niini, gilaoman nga mas mapadali ang pagdala sa mga produktong panguma ngadto sa mga merkado, nga makatabang sa panginabuhian sa mga mag-uuma ug sa pagpalambo sa lokal nga ekonomiya.
Mitambong usab sa maong panagtagbo si Municipal Engineer Carlito T. Culanculan Jr., OIC-Municipal Cooperative Officer Hansel E. Saluba, JD, ug Municipal Assessor Charlie F. Ilagan.
Nagpasalamat usab ang LGU Ipil kang Gener Sison, City Assessor sa Mandaluyong, tungod sa iyang tabang sa pag-coordinate ug pagpadali sa panagtagbo sa mga opisyal.
Gipasalig sa LGU Ipil ubos sa pagpangulo ni Mayor Olegario nga magpadayon kini sa pagpangita og mga oportunidad ug pagpalig-on sa pakigtambayayong sa National Government aron matubag ang mga panginahanglan sa katawhan, mapauswag ang serbisyo publiko, ug mapalig-on ang konektibidad sa mga komunidad, ilabina sa mga lugar nga nagsalig sa panguma.
