Arestado ang usa ka 35-anyos nga lalaki sa gihimong drug buy-bust operation sa Purok 1A, Barangay Tambanan, lungsod sa Naga, Zamboanga Sibugay niaging adlaw.
Gipahigayon ang operasyon sa Special Drug Enforcement Team o SDET sa Naga Municipal Police Station, nga miresulta sa pagkadakop sa suspek nga usa ka minyo, freelance worker ug residente sa maong lungsod.
Nakuha gikan sa suspek ang tulo ka heat-sealed transparent plastic sachet nga adunay puti nga kristal nga substansiya nga gituohang shabu, nga adunay gibana-banang kinatibuk-ang gibug-aton nga usa ka gramo ug standard drug price nga Php 6,800
Gihimo sa mga operatiba ang pagmarka ug imbentaryo sa mga nakuhang ebidensiya sa mismong lugar sa pagdakop, nga gisaksihan sa usa ka barangay councilor sa Barangay Tambanan ug usa ka representante sa media. Gigamit usab ang duha ka alternatibong recording device alang sa dokumentasyon sa operasyon.
Gipahibalo ang nadakpang suspek sa iyang mga katungod subay sa Miranda Doctrine ug sa Anti-Torture Act. Gidala siya sa Naga Municipal Police Station alang sa tukmang disposisyon, samtang ang mga nakuhang gidudahang iligal nga droga ipadala sa Zamboanga Sibugay Provincial Forensic Unit alang sa eksaminasyon.
