Nadakpan ang usa ka lalaki nga namaligya sa drogang shabu sa hiniusang pwersa sa kapulisan sa pagpanguna sa Iligan City Police Station 5 (ICPS5) ubos sa direktang superbisyon ni PMAJ Reagan Y. Adap, Officer-in-Charge ug lead unit, kauban ang mga personahe sa Iligan City Mobile Force Company o ICMFC ubos sa superbisyon ni PLTCOL Mark Kenneth S. Salvacion. Sakop usab sa pre-operation sa Philippine Drug Enforcement Agency o PDEA atol sa gikasang buy-bust operation, sa may alas-4:53 sa hapon niadtong Oktubre 9, 2026 sa Purok 4, Barangay Saray, Iligan City.
Giila ang suspek nga usa ka lalaki, 45 anyos ug residente sa Purok 4, Barangay Saray, sakop ning syudad. Subay sa report, narekober gikan sa nahimutangan sa suspek ang pulo (10) ka gagmayng pakete sa gituohang shabu, lakip na ang usa ka sachet nga napalit sa poseur-buyer atol sa operasyon,
Gibana-bana nga anaa sa 0.75 gramo ang kinatibuk-ang gibug-aton sa nasakmit nga gituohang ilegal nga droga, nga adunay standard drug price nga ₱5,100. Nasakmit usab ang usa ka itom nga coin purse ug duha ka buok nga ₱100 peso bill nga gigamit isip buy-bust money. Sa pagkakaron, ang nadakpang suspek, anaa sa kustodiya sa ICPS5 alang sa tukmang disposisyon.
Photo Courtesy: ICPS5
