Patay ang 25-anyos nga lalaki human ang iyang gimanehong single motorcycle misunggag sa kasugat nga passenger bus sa JC Aquino Avenue, 1st Street, Pareja Subdivision, Barangay Bayanihan, Butuan City, alas 11:45 sa gabii, niadtong nakalabay nga adlaw.
Ang biktima giila nga si alyas “Ian,” residente sa Purok 8, Sagunto, La Paz, Agusan del Sur. Base sa inisyal nga imbestigasyon sa kapulisan, gikan sa Langihan Terminal ang bus ug padulong unta sa Robinsons Terminal. Apan sa pag-hidangat sa maong lugar, kalit lamang ning paka dihang mibangga ang motorsiklo.
Tungod sa kusog sa impact, nakaangkon og mga dili tiaw nga samad ang driver sa motorsiklo ug dali siyang gidala sa balay tambalanan. Apan gideklarang patay ang biktima sa miatiman nga doktor.
Ang driver sa bus giila sa alyas nga “Richard,” residente sa Quezon, Surigao City, ug karon anaa sa kustodiya sa Butuan City Police Station 3 o BCPS-3. Samtang nagpadayon ang imbestigasyon aron matino ang hingpit nga hinungdan sa aksidente ug ang posibleng responsibilidad sa mga nalambigit.
Gipadayon sa kapulisan ang ilang pagpahinumdom sa mga motorista nga magmatngon ug mosunod sa mga lagda sa trapiko, ilabina kung nagmaneho sa gabii, aron malikayan ang susamang aksidente.
