Patay ang usa ka 36-anyos nga lalaki human kini gidunggab sa iyang 46-anyos nga igsuon atol sa usa ka Fun Day activity alang sa mga empleyado sa DOLE Dangcagan Palletizing Compound sa Purok 2, Osmeña, Dangcagan, Bukidnon, pasado alas 5:00 sa hapon niadtong Agosto 22, 2026.
Sumala sa imbestigasyon sa Dangcagan MPS, nag-inom ang magsuon kauban ang uban pang mga trabahante sa dihang naglalis ang duha, hangtod nga nibunot ang suspek ug kutsilyo gikan sa iyang sling bag dayong gidunggab kausa ang biktima sa taas nga bahin sa wala nga dughan.
Gidala gilayon sa Dangcagan Rescue Team ang biktima sa Bukidnon Provincial Hospital (BPH)–Kibawe, apan gideklarar kining Dead on Arrival (DOA) sa doktor.
Nadakpan ra usab ang suspek sa tabang sa Head Security Guard ug Team Leader sa maong pasilidad sa wala pa kini gitunol sa mga miresponding pulis kauban ang kutsilyo nga gigamit sa krimen.
Personal nga away nga gisamotan sa epekto sa ilimnong makahubog maoy motibo sa maong krimen, samtang nagpadayon pa ang gihimong mas lalom nga imbestigasyon sa mga awtoridad sa kasamtangan.
Photo Courtesy: Dangcagan MPS
