Magpahigayon og poster-making contest ug seminar-workshop ang Municipal Civil Registrar (MCR) sa Cabanglasan, Bukidnon karong adlaw’ng Martes, Oktubre 21 ug Lunes, Oktubre 27, 2026. Kini isip pagsaulog sa National Statistics Month ug pagpalig-on sa kaalam sa lungsod bahin sa civil registration.
Sa pakighinabi sa Juander Radyo kang Municipal Civil Registrar Desiree R. Fernandez, ipahigayon ang poster-making contest sa Oktubre 21 sa Municipal Hall nga pagasalmotan sa 12 ka sekondaryang eskwelahan. Samtang sa Oktubre 27, pagahimoon ang seminar-workshop alang sa mga opisyal ug kawani sa barangay aron matudloan sila sa hustong proseso sa pagrehistro sa mga bag-ong natawo ug sa mga dugay nang wala marehistro.
Gawas sa maong mga kalihokan, nagpadayon ang MCR sa pagtabang sa pagkuha og birth, marriage, death certificates, CENOMAR, ug pagtul-id sa mga sayop nga rekord sa civil registry. Giawhag usab sa opisina ang mga walay birth certificate nga moduol dayon sa ilang barangay secretary aron maka-apil sa Birth Registration Assistance Project (BRAP).
Photo courtesy: MCR – Cabanglasan/ Desiree Fernandez
