Nangayo og hugot nga aksyon ang pipila ka mga vendor sa pampublikong merkado sa Lungsod sa Nabunturan, Davao De Oro ngadto sa lokal nga panggamhanan batok sa mga nagbaligya og karne sa gawas sa merkado o warik-warik, ilabina ang walay permit, apil usab ang mga duol nga meat shop sa palengke tungod kay nakaapekto kini sa ilang panginabuhian.
Matod sa usa ka vendor nga si alyas “Inday,” nagbayad sila og dagkong bayronon alang sa lisensya, abang sa pwesto ug uban pang obligasyon, busa ilang gihangyo nga patas usab ang pagpatuman sa mga lagda sa tanang nagbaligya.
Dugang pa niya, dugay na nilang gisang-at ang maong isyu ngadto sa lokal nga panggamhanan ug nagpaabot sila sa konkretong aksyon aron masulbad ang ilang reklamo.
Samtang gipasiugda ni SB Atty. Carlo Ancla ang panginahanglan sa mas hugot nga pagpatuman sa biosecurity measures batok sa African Swine Fever o ASF. Matod niya, importante ang aktibong papel sa mga LGU sa pagpatuman sa preventive measures aron mapugngan ang pagkatap sa sakit.
Sa pagkakaron, naglaom ang mga vendor nga matubag sa lokal nga panggamhanan ang ilang mga kabalaka ug mapalig-on ang implementasyon sa mga lakang batok sa ASF ug sa mga walay permit nga nagbaligya og karne.
