Sikop sa mga operatiba sa Tagbina Municipal Police Station (MPS) si alyas “Dodong” nga giila isip Top 2 Municipal-Level Wanted Person, human gisilbi ang warrant of arrest batok kaniya niadtong Lunes, Agosto 3, 2026, didto sa Barangay Osmeña, Tagbina, Surigao del Sur. Giaresto ang suspetsado tungod sa krimen nga Acts of Lasciviousness nga may kalabutan sa Republic Act No. 7610 o ang Special Protection of Children Against Abuse, Exploitation, and Discrimination Act.
Ang maong operasyon gipangulohan ni PCPT Mark Steven Y. Sarsonas, ang Officer-in-Charge sa Tagbina MPS. Giisyu ni Hon. Merlyn B. Pacaro-Caredo, Presiding Judge sa RTC Branch 29 sa Bislig City, ang warrant batok sa akusado. Human gipahibalo sa iyang mga katungod, gidala gilayon ang suspetsado sa Tagbina MPS alang sa dokumentasyon.
Sa kasamtangan, temporaryong anaa sa kustodiya sa Tagbina MPS ang dinakpan samtang gihulat ang iyang pormal nga turnover ngadto sa korte nga nag-isyu sa warrant alang sa sunod nga legal nga proseso.
photo courtesy:Tagbina MPS
