Nagpahimangno ang M’lang Municipal Police Station ngadto sa publiko aron malikayan ang pagkahulog sa nagkalain-laing online scam. Pinaagi sa ilang gipagawas nga “Online Scam Safety Tips,” giawhag niini ang tanan nga susihon pag-ayo ang nagpadala sa mensahe, ilabi na kung wala mailhi ang email address o numero sa telepono.
Gipahimangno usab sa kapulisan nga dili dayon motuo sa mga mensahe nga nagdali o naghulga aron mapugos ang usa ka tawo sa paghatag og personal nga impormasyon. Dili usab angay nga i-klik ang mga kadudahang link ug likayan ang pagpadala og salapi pinaagi sa gift cards, cryptocurrency, o ubang dili kasagarang pamaagi sa bayad.
Samtang, gidasig usab sa M’lang MPS ang publiko nga kanunayng kumpirmahon ang impormasyon pinaagi sa opisyal nga website o hotline sa usa ka kompanya o ahensya sa dili pa motubag sa mga mensahe. Kon adunay pagduda, mas maayong ireport dayon kini sa kapulisan aron malikayan ang mahimong biktima sa online scam.
Photo Courtesy:M’LANG MPS
