Gipahibalo ni Cebu City Mayor Nestor Archival nga misugyot ang Department of Environment and Natural Resources Central Visayas (DENR)-7 sa pagtukod og transfer station sa Pond A sa South Road Properties (SRP) isip contingency measure sa panahon sa emerhensiya kun dili makasulod ang mga trak sa basura sa Barangay Binaliw.
Matod sa mayor, ang maong pasilidad dili mahimong open area sama sa kasamtangang temporaryong transfer station. Hinuon, kini sementado ug adunay atop ug bungbong aron mapugngan ang baho ug ang pagtulo sa duga sa basura nga mahimong hinungdan sa kontaminasyon sa palibot.
Ang plano kabahin sa pagpangandam sa siyudad sa pagbalik sa paglabay og basura ngadto sa Prime Waste Solutions Cebu, Inc. sa Bgy. Binaliw human sa pagkompleto sa dugang nga landfill cell.
Nagpadayon sa pagkakaron ang paglabay sa siyudad og basura ngadto sa lungsod sa Aloguinsan samtang nagpaabot pa og kumpirmasyon gikan sa operator sa PWS kung kanus-a mahimong makabalik ang dakbayan sa Sugbo sa paggamit sa Binaliw landfill.
Photo courtesy:Freeman
