Nagpahigayon og joint coordination meeting ug final site inspection ang DOST-Philippine Institute of Volcanology and Seismology (PHIVOLCS) uban sa DOST Regional Office IX, DOST Zamboanga Sibugay Provincial Office, project contractor, ug LGU Olutanga alang sa pag-instalar sa Sea Level Monitoring System (SLMS) sa lungsod sa Olutanga, Zamboanga Sibugay.
Ang kalihokan nagtumong sa pagsiguro nga andam ang gitakdang lokasyon ug hapsay ang implementasyon sa proyekto, lakip ang paghisgot sa mga kinahanglanong preparasyon, operasyon, ug responsibilidad sa matag partner agency aron mapadayon ang maayong pagdumala ug seguridad sa monitoring facility.
Nanguna sa site inspection si Engr. Arnaldo Melosantos, Supervising Science Research Specialist sa DOST-PHIVOLCS, uban sa iyang mga staff, mga personnel sa DOST Zamboanga Sibugay, mga miyembro sa Sangguniang Bayan, ug ang Municipal Disaster Risk Reduction and Management Office (MDRRMO).
Ang Sea Level Monitoring System (SLMS) kabahin sa nasudnong tsunami monitoring network sa PHIVOLCS nga naghatag og real-time sea level monitoring aron makatabang sa sayong pag-detect sa tsunami, hazard assessment, ug pagpagawas sa tukmang tsunami advisories ug warnings.
Gilauman nga ang pagbutang sa maong monitoring station sa Olutanga makapalig-on sa tsunami monitoring capability sa nasud ug makapauswag sa disaster preparedness, response, ug resilience sa mga komunidad sa kabaybayonan sa Zamboanga Sibugay ug kasikbit nga mga lugar.
Photo Courtesy:DOST Regional Office IX
