Opisyal nga gilunsad sa Department of Trade and Industry (DTI) General Santos City ang ikalimang One Town, One Product (OTOP) Kiosk sa dakbayan niadtong nakalabay nga adlaw sa bag-ong giablihang Salinda Native Products and Pasalubong Center nga nahimutang sa Tiongson Street, Barangay Lagao.
Gipakita sa maong OTOP Kiosk ang nagkadaiyang Tatak SOCCSKSARGEN (SOX) nga mga produkto nga gihimo sa mga lokal nga micro, small, ug medium enterprises (MSMEs). Tumong sa programa ang paghatag og mas dagkong oportunidad sa merkado alang sa mga lokal nga negosyante, samtang gipadali ang pag-abot sa kalidad nga lokal nga mga produkto ngadto sa mga konsumidor ug mga turista.
Samtang, ang pag-abli sa Salinda Native Products and Pasalubong Center gilauman nga mahimong usa ka sentrong mapalitan sa mga lumad nga produkto, handicrafts, ug pasalubong gikan sa nagkadaiyang probinsya sa Rehiyon 12. Lakip niini ang tradisyonal nga mga binuhat sa tribung Blaan ug uban pang lokal nga produkto nga nagpakita sa dato nga kultura ug panulondon sa SOCCSKSARGEN.
Sumala sa DTI, ang OTOP Program nagpadayon sa pagpalig-on sa mga MSMEs pinaagi sa pagdasig sa inobasyon, pagpalambo sa kalidad sa mga produkto, ug pagpalapad sa ilang merkado aron mas mailhan ug mapalit ang mga produktong hinimo sa lokal.
Photo Courtesy: Philippine Information Agency
