Gibansay ang 32 ka mag-uuma ug kabatan-onan gikan sa Bago Ingud Irrigators’ Association sa paggamit sa digital nga teknolohiya sa pagpanguma pinaagi sa Digital Farmers Program, Farm Learn Batch 3.
Sulod sa lima ka adlaw nga pagbansay sa Mindanao State University–Sultan Naga Dimaporo, nakakat-on ang mga partisipante sa Smart Agriculture Technologies, digital agriculture platforms, social media marketing, ug paggamit sa agricultural drones aron mas mapauswag ang ilang pagpanguma.
Ang maong programa gipahigayon sa Agricultural Training Institute–Regional Training Center 10 sa pakigtambayayong sa Municipal Agriculture Office sa Sultan Naga Dimaporo ug MSU-SND, isip kabahin sa paningkamot nga mapalig-on ang paggamit sa digital nga teknolohiya sa mga mag-uuma ug mapataas ang produksiyon sa agrikultura.
