Nadiskubrehan sa usa ka nagpakabanang residente sa Carmen, Davao del Norte ang mokabat sa kapin 121 ka master cases nga gidudahang ilegal nga sigarilyo daplin sa Tala River sa Purok 1, Barangay Taba, Carmen, sa nasangpit nga probinsya, bandang alas 3:40 sa kadlawon niadtong Hulyo 30, 2026.
Gitaho ang maong insidente sa naasoy nga lumulopyo nga usa ka 54 anyos, barangay konsehal sa nahisgutang lugar, ngadto sa Carmen Municipal Police Station human nakit-an ang mga kinahon nga sigarilyo nga giabandona sa maong dapit.
Dali nga miresponde ang kapulisan ubos sa pagmando ni PMAJ Lope I. Cebreros III aron susihon ang maong impormasyon. Nakigkoordinar usab sila sa Regional Special Operations Group 11, Provincial Intelligence Unit sa Davao del Norte Police Provincial Office, ug sa Davao del Norte Maritime Police Station alang sa hapsay nga pagdumala sa operasyon.
Sa pag-inspeksyon sa area, narekober ang mga master cases sa Bosqu cigarettes ug usa ka puti nga Mazda Transformer nga adunay plaka KBK-7068. Gidudahan nga ang mga sigarilyo nalambigit sa paglapas sa Republic Act 10643 o Graphic Health Warning Law. Gibanabana nga mokabat sa P3,025,000 ang kantidad sa narekober nga mga kontrabando.
Sa pagkakaron, anaa na kini sa kustodiya sa Carmen Municipal Police Station alang sa hustong disposisyon samtang padayon ang imbestigasyon sa otoridad aron mailhan ang mga responsable sa maong mga ilegal nga butang.
Photo Courtesy: PNP Tagum City Police Station
