Gihangyo ni Konsehal Imee Rose Moreno nga magkatigom ang hingtungdang mga komitiba sa Konseho sa dakbayan sa Cagayan de Oro ug mag-imbeta og mga nasudnong ahensya sa gobyerno aron nga maghisgut ug makamugna og konkretong mga sumbanan sa pagtubag sa bisan unsa mang hulga sulod sa mga tunghaan.
Gipamahayag kini sa Konsehal sa iyahang special report atol sa regular nga sesyon, human sa ninggula nga video sa social media kalabot sa usa ka batan-ong nagpadayag og posibleng pagpangatake sa pipila ka mga tunghaan sa syudad.
Tuod, nangayo na og pasaylo ang nalambigit nga batan-on ug gikustodiya na sa CSWD, naghinungdan gihapon kini sa kahadlok ug kalisang sa mga magtutungha, sa mga ginikanan ug sa tibuok komunidad.
Busa, gipanghingusgan sa Konsehal nga dili kini angay ibaliwala o ikonsidera nga gamay nga butang. Labing maayo nga muaksyon na daan karon ayha paman adunay mahitabong lain na usab nga krimen ug kagubot sulod sa tunghaan.
Photo courtesy: CdeO City Council
