Bisan og misaka ang importasyon sa karne sa unang unom ka bulan sa 2026, gipasidaan sa usa ka grupo sa industriya nga posibleng maapektuhan ang importasyon sa umaabot nga mga bulan tungod sa huyang nga panginahanglan sa mga konsumidor, paggrabe sa port congestion, ug pagkunhod sa bili sa piso.
Base sa datos sa Bureau of Animal Industry (BAI), miabot sa 872.27 milyon ka kilo ang naangkat nga karne gikan Enero hangtod Hunyo, mas taas og 12.1 porsiyento kun itandi sa 778.1 milyon ka kilo sa samang panahon niadtong miaging tuig.
Ang maong gidaghanon sama na sa kapin 53 porsiyento sa kinatibuk-ang 1.64 bilyon ka kilo nga karne nga giangkat sa tibuok 2025.
Daghang panghitabo sa sinugdanan sa tuig ang nakaapekto sa negosyo, lakip ang tensiyon tali sa Iran ug Israel, ang dugang pagkunhod sa bili sa piso human sa kontrobersiya sa korapsyon, pagsaka sa minimum wage, ug pagtaas sa gasto sa transportasyon, logistics, ug utilities.
Padayon usab nga naglisod ang mga meat traders tungod sa port congestion nga nagsugod pa sukad sa peak season sa miaging tuig, hinungdan nga daghang kompanya ang naglangan sa ilang mga order.
Gibanabana usab nga ang port congestion makadugang og labing menos ₱50,000 matag container, o katumbas sa ₱2 hangtod ₱5 matag kilo, depende sa klase sa produkto.
Bisan pa niini, nagpabiling huyang ang panginahanglan sa merkado, ilabina sa Luzon, hinungdan nga daghang importers ang naglisod sa pagpagawas sa ilang mga container tungod usab sa pagkunhod sa bili sa piso.
Photo courtesy:Philippine News Agency
