Gipalapdan sa Department of Social Welfare and Development (DSWD) ang Sustainable Livelihood Program (SLP) aron maapil na usab ang online negosyo. Sa pilot launch nga gipahigayon sa Valenzuela City, kapin sa 170 ka kabus ug marginalized nga benepisyaryo ang nakadawat og ₱10,000 nga grant isip sinugdanang puhunan sa ilang online o digital nga negosyo.
Nakigtambayayong ang DSWD sa TikTok Shop aron tudloan ang mga benepisyaryo sa live selling, online marketing, cybersecurity, financial literacy, ug ubang pamaagi sa pagdumala sa negosyo.
Matod pa kay Secretary Rex Gatchalian, tumong sa programa ang paghatag og dugayng panginabuhian isip solusyon batok sa kakabos.
Gipatin-aw sab sa ahensya nga ang ₱10,000 dili utang kondili grant, ug padayon nilang monitoron ang paglambo sa matag negosyo.
Human sa pilot implementation sa Valenzuela, plano sa ahensya nga ipadayon ang programa sa Vigan, Iloilo, Tagum, ug ulahi na sa tibuok nasud.
Photo Courtesy: DSWD
