Patay ang usa ka 28-anyos nga motorista human aksidenteng mibangga sa usa ka Truck tractor sa Maharlika Highway, Sitio Tumanday, Barangay Rizal, dakbayan sa Surigao, niadtong nakalabay nga adlaw.
Sa nakuhang impormasyon sa Surigao Component City Police Station, naila ang biktima nga si Lorejun Llamera Cayumo, molupyo sa Barangay Rizal, dakbayan sa Surigao, nag-drayb sa kolor itom nga Mitsukoshi Euro-Motorsiklo.
Samtang ang kolor Puti Chenglong Truck Tractor Head, nakabase sa Cagayan de Oro, gimanehoan ni Jocol Solin-ay Padilla, 30-anyos, mulopyo sa Barangay Nam-nam, San Fernando, Bukidnon.
Base sa inisyal nga imbestigasyon sa kapulisan, nagkasugat ang motorsiklo ug truck sa diversion road sa Barangay Rizal nga miresulta sa pagkabangga.
Tungod sa kusog nga impact, grabeng samad ang naangkon sa rider ug gideklarang patay sa mga responder nga PDRRMO. Gidala sa kapulisan ang drayber sa trak nga si Padilla alang sa dugang imbestigasyon, samtang gihatod ang patayng lawas sa biktima sa usa ka punerarya sa Surigao City.
Padayon ang imbestigasyon sa kapulisan alang sa tukmang disposasyon.
