Samdan ang duha ka sibilyan human kini maigo sa bala nga gikan sa armas sa usa ka sundalo nga giilang si alyas “Tep” 31-anyos ug miyembro sa Philippine Army 43rd Infantry Batallion, nga gikatahong namusil didto sa Diversion Road sa Purok 1, Barangay 13, Catbalogan City, Samar, takna sa hapon niadtong nakalabay nga adlaw, Hulyo 21, 2026.
Base sa inisyal nga imbestigasyon, giingong nakainom og makahubog nga ilimnon ang suspek sa wala pa ang insidente. Sumala sa report, gisultihan siya ni alyas “Jim” nga tarongon ang iyang pagparking, apan wala kini mouyon. Tungod niini, giingong gikuha sa suspek ang iyang armas ug mipabuto. Wala may naigo sa unang pagpabuto, hinungdan nga gisumbag siya ni Jim.
Samtang mikalagiw ang suspek, giingong mipabuto pa kini og duha ka higayon nga maoy nakaigo sa duha ka sibilyan nga naangol. Dali nga gidala ang mga biktima sa Samar Provincial Hospital diin padayon silang gitambalan sa mga doktor.
Dali usab nga nadakpan ang suspek pinaagi sa tabang sa mga residente sa maong lugar sa wala pa kini gitugyan sa kapulisan. Anaa na karon ang suspek sa kustodiya sa Philippine National Police (PNP) samtang giandam ang angayang mga kaso nga ipasaka batok kaniya. Padayon usab ang imbestigasyon sa mga otoridad aron matino ang kompletong detalye nga misangpot sa insidente.
Photo Courtesy: Journo Arlene
