Patay nang nakaplagan ang usa ka lalaki daplin sa Macapagal Bridge sa Barangay Doña Maxima, San Luis, Agusan del Sur, sumala sa San Luis Municipal Police Station.
Base sa report, nakadawat og tawag ang kapulisan pinaagi sa PNP Hotline mahitungod sa maong insidente. Dayon mitubag ang mga pulis nga gipangulohan ni PCPT Alan Y. Badajos, Acting Chief of Police sa San Luis MPS, aron inspeksyonon ang lugar.
Pag-abot sa mga otoridad, ilang gisiguro ang crime scene ug gipahigayon ang inisyal nga imbestigasyon ug scene processing subay sa gitakdang police operational procedures.
Atol sa imbestigasyon, nasayran nga ang namatay usa ka residente sa lungsod sa Talacogon, Agusan del Sur. Gipahibalo dayon ang pamilya sa biktima ug ilang gikuha ang lawas alang sa hustong pag-atiman ug paglubong.
Nakigkoordinar usab ang kapulisan sa ubang may kalabutan nga ahensya aron masiguro ang husto nga pagdumala ug dokumentasyon sa insidente. Sa pagkakaron ang imbestigasyon sa kapulisan aron matino ang tinuod nga hinungdan sa kamatayon sa biktima.
Photo courtesy: San Luis MPS
