Tingkagol karon sa prisohan ang giilang Regional Top 2 Most Wanted Person human kini nadakpan sa mga otoridad tungod sa upat ka ihap sa kasong Statutory Rape didto sa Purok 2, Barangay San Teodoro, Bunawan, Agusan del Sur niadtong Hulyo 22, 2026.
Ang malampusong law enforcement operation gikasang-at sa mga personahi sa Bunawan Municipal Police Station (MPS) ubos sa hugot nga pagpangulo sa Agusan del Sur Police Provincial Office (ADSPPO) sa pamunoan ni Provincial Director PCOL Yahya Bustamante Yusup.
Sumala sa pamahayag sa ADSPPO, ang pagkasikop sa maong akusado nagpakita sa ilang walay puas nga komitment sa pagpatuman sa balaod ug pagsiguro nga ang mga nag-atubang ug seryosong krimen mapanubag gayod sa hukmanan.
Sa pagkakaron, ang maong dinakpan temporaryong anaa sa kustodiya sa Bunawan MPS alang sa tukmang dokumentasyon sa dili pa kini hingpit nga iturn-over ngadto sa korte nga nagkupot sa iyang warrant of arrest.
Photo courtesy: ADSPPO
