Patay na nga miabot sa hospital ang usa lalaki, human kini gipusil didto sa Kanapia Subdivision, Barangay Poblacion, Kidapawan City. Giilla sa kapulisan ang biktima nga si Baser Lindasen Mangakoy, 36-anyos, minyo, empleyado sa Merbin Recruitment Agency, ug residente sa Pikit, North Cotabato.
Sumala sa impormasyon nga nahipos sa Juander Radyo News Team gikan kang PLT Elben Christ Jon Dipad, Admin PCO sa Kidapawan CPS, pasado alas 6:00 kagabii, Hulyo 22 niining tuiga, samtang ginasubay sa biktima ang kalsada sa Purok Tambis, Kanapia Subdivision pauli sa iyang boarding house sakay sa scooter type nga motor, kalit lamang kining gi-ambush ug gipusil sa makadaghang higayon sa suspek.
Human sa insidente, dali nga misibat ang suspek sakay sa itom nga XRM nga motor paingon sa Barangay Magsaysay Road, sakop sa dakbayan. Samtang nakaangkon og daghang samad-pinusilan ang biktima, hinungdan nga gidala dayon kini sa hospital aron matambal, apan gideklara siya nga dead on arrival sa attending doctor. Narekober gikan sa crime scene ang upat ka basiyo sa bala ug usa ka deformed-slug nga gituohang gikan sa kalibre .45 nga pistula.
Sa kasamtangan, padayon pa ang imbestigasyon sa Kidapawan City Police Station, aron masayran kung si kinsa ang responsable sa nahitabong pagpamusil sa biktima ug unsa ang motibo sa nahisgutang pagpamusil.
Photo Courtesy: Jun Villasoto
