Magahin og pondo ang Department of Education (DepEd) Region alang sa pag-hire og external tutors nga motabang sa mga estudyante nga adunay learning gaps ubos sa Academic Recovery and Accessible Learning (ARAL) Program. Matud ni DEPED 9 Regional Director Ronelo Al Firmo, sa school year 2026-2027 adunay budget nang gigahin para sa external tutors aron dili na mahimong overload ang mga regular teachers sa ilang mga trabahoon.
Pagpasabot ni RD Firmo, kon ugaling kulang ang budget nga gi-alokar alang sa usa ka public school para sa pag-hire ug mga external tutors, mahimo ra gihapon nga mo-tap sa mga regular teachers apan bayaran gihapon ilang serbisyo isip “overload payment”.
Segon ni RD Firmo, ang mga external tutor mahimong motabang sa mga estudyante pinaagi sa tutorial sessions ug remedial activities aron matabangan sila nga makabawi sa mga learning competencies nga angay makat-unan.
Kabahin usab matud pa kini sa paningkamot sa DepEd Region 9 nga mapapaspas ang academic recovery sa mga learners ug masiguro nga walay estudyante nga mapabilin tungod sa learning gaps.
