Mahimo nang mapahimuslan sa mga kwalipikadong miyembro sa PhilHealth ang libre nga cancer screening pinaagi sa PhilHealth Konsulta Caravan sa tulo ka mga tambalanan sa Zamboanga del Sur.
Matud ni PhilHealth Local Health Insurance Office (LHIO) Zamboanga del Sur Head Arnyl Corpuz, ang mga tambalanang naghatag sa maong serbisyo mao ang Hofileña Hospital, Zamboanga del Sur Medical Center, ug Margosatubig Regional Hospital.
Sa Hofileña Hospital, lima ka klase sa cancer screening ang mahimong ma-avail sama sa breast ultrasound, low-dose chest CT scan, colonoscopy, Alpha-Fetoprotein (AFP) blood test, ug liver ultrasound.
Sa Margosatubig Regional Hospital, duha ka screening tests ang gitanyag nga naglakip sa breast ultrasound ug liver ultrasound, samtang sa Zamboanga del Sur Medical Center, upat ka screening tests ang mahimong mapahimuslan nga naglangkob sa mammogram, breast ultrasound, low-dose chest CT scan, ug liver ultrasound.
Giawhag usab ni Corpuz ang tanang miyembro sa PhilHealth nga una magpakonsulta sa ilang PhilHealth Konsulta accredited provider aron masusi kung kwalipikado sila sa libreng cancer screening ug mapahimuslan ang maong benepisyo.
