Narekober sa kapulisan ang kapin usa ka libo kilos nga copper ore human gibiyaan sa hilit nga lugar sa Purok 5, Barangay Upper Landing, Dumingag, Zamboanga del Sur, alas 4:10 sa kaadlawon niadtong Hulyo 19.
Base sa report, nakadawat og impormasyon ang Dumingag Municipal Police Station bahin sa mga sinako nga adunay gidudahang mineral ore nga gibiyaan sa maong lugar. Dali nga girespondehan sa kapulisan ang maong lugar uban ang deputized Mines and Geosciences Bureau (MGB) personnel ug ilang namatikdan ang 20 ka sako nga mineral ore.
Human sa inspeksyon, gikumpirma sa MGB nga copper ore ang sulod sa mga sako diin gibana-bana nga moabot sa usa ka libo ka kilo ang gibug-aton niini nga may kantidad nga P40,000.
Sa karon, ang mga na-recover nga copper ore anaa na sa kustodiya sa Dumingag MPS ug itugyan sa MGB Regional Office IX alang sa hustong disposisyon. Samtang nagpadayon pa usab ang imbestigasyon sa kapulisan aron mailhan ang mga responsable nga nag-abandona sa maong mga mineral ore.
