Hisgutan sa unang miting sa bag-ong natukod nga Provincial HIV/AIDS Multisectoral Council ang pagpalig-on sa komprehensibong sex education sa mga tunghaan.
Matod ni Provincial Board Member Stanley Caminero, vice chairman sa konseho, makigtinabangay sila sa Department of Education (DepEd) aron masayran ang dugang nga suporta nga gikinahanglan sa pagpalig-on sa health education sa mga eskwelahan.
Giingon niini nga mahimo usab nilang ipaambit sa DepEd ang datos sa HIV sumala sa edad ug gender aron moggiya sa pagpaayo sa sex education ug sa paghimo og mga polisiya.
Sumala ni Caminero, 29 porsiyento sa mga natalang kaso sa HIV anaa sa mga edad 15 hangtod 24 anyos, samtang 52 porsiyento anaa sa mga edad 25 hangtod 34 anyos. Kapin sa 80 porsiyento sa tanang kaso gikan niining duha ka grupo sa edad, hinungdan nga kinahanglan pang palig-onon ang mga programa sa pagpugong ug edukasyon.
Gipasabot usab niya nga ang pagsaka sa mga nadiagnose nga kaso mahimong resulta sa mas sayon nga pag-access sa HIV testing ug mas maayo nga pag-ila sa mga kaso, dili lamang tungod sa pagtaas sa aktuwal nga pagkatap sa HIV.
Photo courtesy: Advin Health Care
