Patay na ug gihaya na ang 43-anyos nga babaye nga giingong gipusil sa iyang 53-anyos nga live-in partner nga usa ka barangay kagawad sa Purok 5, Barangay Boniao, Mahayag, Zamboanga del Sur, niadtong Hulyo 19, 2026.
Kahinumduman, sa gipagawas nga imbestigasyon sa kapulisan naka-angkon ug igo pinusilan sa tuo nga aping ang biktima nga giilang si “Eve” human gipusil sa suspetsado nga si Junie nga mismong ka live-in partner ra gumikan sa wala matumbok nga rason.
Human sa gihimo sa suspetsado nga pagpusil ngadto sa biktima, nag-unay usab kini ug pusil sa iyang kaugalingon igo sa agtang hinungdan sila susama naka-angkon ug mga samad pinusilan sa una nang gitumbok nga parte sa lawas. Dali nga miresponde ang mga kapulisan sa dapit nahitabuan ug gidala ang suspetsado ug biktima sa pinakaduol nga tambalanan aron madapatan sa dinaliang medikasyon.
Apan walay swerte nga ang biktimang babaye nakabsan ra gihapon sa hinulamang kinabuhi samtang ang suspetsado nga ka live-in partner nga namusil padayon pa usab nga nagpaalim karon sa tambalanan. Padayon pa usab ang imbestigasyon karon sa kapulisan, samtang giandam na ang mga dokumento alang sa pagpasaka sa tukmang kaso batok sa suspetsado.
