Gipailawom pag-usab sa National Grid Corporation of the Philippines (NGCP) ang tibuok Visayas grid sa status nga yellow alert niadtong Martes sa gabii, tungod sa pagnipis sa reserba sa kuryente sa rehiyon sa panahon sa kinapungkayang oras sa paggamit (peak hours).
Ang maong yellow alert napatuman sugod sa alas-5 sa hapon hangtod sa alas-8 sa gabii diin ang anaa nga kapasidad sa kuryente mitala lamang sa 2,590 megawatts (MW) batok sa gilaumang peak demand nga moabot ngadto sa 2,394 MW.
Sumala sa NGCP, ang pagnipis sa suplay sa kuryente taliwala sa taas nga panginahanglan gipahinabo sa padayon nga pagkapalong o pagka-dili magamit sa dagkong coal-fired power plants sa Visayas, partikular na ang TVI Units 1 and 2, ug ang PCPC.
Gipatin-aw sa maong ahensya nga ideklarar ang yellow alert kon ang operating margin o reserba sa kuryente mousos ubos sa gitakdang contingency requirement sa transmission grid, bisan pa man kon aduna pa’y igong suplay nga magamit ang publiko.
Photo Courtesy:PNA
