Niabot ngadto sa kapin 1.7 milyon ka mga residente ang napugos nga mobiya sa ilang mga panimalay ug nipahikling ngadto sa mas luwas nga dapit human nga hingpit nga nag-landfall ang Bagyong Bavi didto sa Zhejiang, China. Tungod sa kakusog sa bagyo, nga nagdala og hangin nga may gikusgon nga 144 kilometro matag oras, dali nga nagpagawas og kamandoan ang kagamhanan sa ilang nasod aron masiguro ang kaluwasan sa mga tawo.
Aron makapangandam ang publiko, gitaas sa China ang orange typhoon alert sa bahin sa Eastern China, nga ikaduha sa labing taas nga lebel sa ilang upat ka lebel nga storm rating system. Tungod niini, gipatuman ang lapad nga suspensyon sa mga klase sa eskwelahan ug temporaryo usab nga gipahunong ang operasyon sa mga sakayan sa dagat o ferry services sa dapit.
Gawas sa pagsuspendi sa mga klase ug ferry, dako usab ang nahimong epekto niini sa transportasyon kay daghang mga biyahe sa ayroplano ang nangakansela ug gikunhoran sab ang biyahe sa mga tren aron malikayan ang disgrasya. Gawas sa China, nakasinati usab og mga pag-ulan ug kusog nga hangin ang habagatang bahin sa Japan ug ang nasod sa Taiwan samtang nagbira padulong ang bagyo.
Photo courtesy: REUTERS
