Nagpasidaan ang Bangko Sentral ng Pilipinas (BSP) nga estrikto nga gidili ug ilegal ang pag-photocopy, pag-print, o paghimo og bisan unsang kopya sa mga kwarta nga papel sa nasod kon walay legal nga permiso gikan sa ilang buhatan. Gihimo sa BSP kini nga pahayag aron tul-iron ang nikatap nga sayop nga balita sa social media nga matod pa pwede ra gamiton ang photocopied nga kuwarta isip pambayad sa mga palaliton.
Base sa Circular No. 829 (2014) sa ahensya, ang pag-apod-apod ug paggamit sa mga hulagway o peke nga kopya sa kuwarta nga walay awtorisasyon usa ka seryoso nga kalapasan sa balaod. Ang kinsa man nga madakpan ug mapamatud-an nga nakalapas niini mahimong mag-atubang sa silot nga priso sulod sa 5 ngadto sa 10 ka tuig.
Hinuon, giklaro sa BSP nga duna silay gihatagan og eksepsiyon apan ubos gihapon sa ilang pagtugot. Mahimo lamang kopyahon ang mga kuwarta nga papel kon kini gamiton alang sa katuyoan sa edukasyon, kasaysayan, o numismatic (pagtuon ug pagkolekta og salapi).
Photo courtesy: Assortedge
