Miangkon ang “Asia’s Diamond Soul Siren” nga si Nina nga nakasinati usab siya og sexual harassment ug bullying sa dihang nagsugod pa lang siya sa industriya sa musika. Gipadayag sa singer nga dili ikalimod nga adunay ingon-anang mga panghitabo sa industriya, ilabina sa mga bag-ong artist nga nangandoy nga mosikat.
Matud ni Nina, importante nga magpabiling lig-on ug mabinantayon ang mga bag-ong artista aron malikayan ang posibleng pagpahimulos. Gipadayag usab niya nga nakasinati siya og pag-bully gikan sa ubang kauban sa pagkanta sa wala pa siya nahimong recording artist, apan wala niya kini tubaga ug kompetisyon. Hinuon, gipili niyang ipaagi sa iyang talento ang pagpamatuod sa iyang kaugalingon.
Gihisgutan usab ni Nina ang iyang amahan nga si Filbert Girado, nga maoy nagtudlo kaniya sa pagkanta apan kaniadto wala mouyon sa iyang pagpadayon sa singing career. Matud sa singer, wala na nakaabot ang iyang amahan sa pagtan-aw sa kalampusan sa iyang unang album tungod kay namatay kini sa tuig 2000. Bisan pa niini, iyang giingon nga ang tanan niyang mga kanta gihalad alang sa iyang amahan.
Mahitungod sa social media, miingon si Nina nga dili kaayo siya mobasa sa mga negatibong komento. Alang kaniya, ang makadawat og bashers kabahin na sa pagkapopular, apan iyang tagdon lamang ang mga kritisismo nga makatabang sa iyang paglambo ug pasagdan ang walay basehan nga mga pagpangdaot.
Samtang, nag-andam si Nina alang sa iyang “Nina XX The Anniversary Celebration: The Repeat” nga concert nga ipahigayon sa Setyembre 24, 2026 sa Newport Performing Arts Theater, uban nila Christian Bautista, Top Suzara, ug Thor isip mga espesyal nga bisita.
Photo Courtesy: Orange Magazine
