Usa ka iro nga ginganlag Arturo ang nahimong viral sa social media human sa iyang talagsaong pagpakita sa pagkamatinud-anon ngadto sa iyang amo sa La Calera, Córdoba, Argentina.
Sumala sa mga report, ang amo ni Arturo, usa ka lalaking walay permanenteng puluy-anan nga gidala sa ospital tungod sa grabeng sakit ug sa ulahi gibalhin sa laing ospital diin siya namatay.
Wala mahibalo ang iro nga si Arturo sa nahitabo, busa nagpabilin siya sa gawas sa emergency room sulod sa 25 ka adlaw ug naglaom nga mogawas ug mobalik ang iyang amo.
Samtang naghulat, giatiman usab siya sa mga empleyado sa ospital pinaagi sa paghatag og pagkaon ug pagpanalipod kaniya.
Human mikatag ang iyang storya sa social media, daghang tawo ang natandog sa iyang walay kondisyon nga gugma ngadto sa iyang amo hinungdan, naghiusa ang komunidad aron makapangita og bag-ong moatiman kaniya.
Sa ulahi, usa ka babaye nga ginganlag Guadalupe ang miampon kang Arturo ug gidawat siya isip bag-ong miyembro sa ilang pamilya.
Photo Courtesy: HEARTS OF PAW’S
