Gipahibalo sa pamunuan sa OceanJet Ferry ang gikatakdang pagkunhod sa pletehan sa ilang mga sakayan sa dagat alang sa rotang Cebu paingon sa Ormoc ug bise bersa (vice versa).
Subay sa opisyal nga pahibalo sa maong kompanya, ang maong kausaban sa taripa opisyal nga mag-epektibo karong umaabot nga Hulyo 10, 2026.
Ang maong lakang gilauman nga makahatag og dako nga kahupayan sa panalapi sa mga regular nga mga komyuter, ug mga magpapatigayon nga kanunay nagsalig sa maong transportasyon sa kadagatan.
Ubos sa bag-ong kamanduan, ang pletehan alang sa Tourist ug Open Air Class mapakunhod na ngadto sa Php 1,210, samtang ang Business Class mahimo na lamang nga Php 1,760.
Kini nga rollback sa pletehan giingong dako og ikatabang sa pagpadasig pa sa lokal nga ekonomiya ug turismo tali sa lalawigan sa Sugbo ug sa Leyte, pinaagi sa paghatag og mas barato ug daling maabot nga serbisyo sa transportasyon alang sa publiko.
