Sikop ang upat ka mga tawo, lakip ang usa ka mag-live-in partner ug duha ka giingong drug den visitors, atol sa joint buy-bust operation nga gipahigayon sa Philippine Drug Enforcement Agency (PDEA) sa Purok 4, Barangay Aplaya, Digos City alas 3:35 sa hapon sa Hulyo 8.
Gipangulohan ni IA V Clodito V. Cañada, PhD, Provincial Officer sa PDEA Davao del Sur, ang operasyon uban sa Provincial Drug Enforcement Unit sa Davao del Sur Provincial Police Office ug Digos City Police Station.
Target sa operasyon si alyas Brad, 49 anyos, nga giingong drug den maintainer. Nadakpan usab ang iyang live-in partner nga si alyas Linda, 50 anyos, nga giingong drug den employee. Apil sa nadakpan sila alyas Jeffrey, 25 anyos, ug alyas Buchoy, 30 anyos, nga giingong drug den visitors.
Nakumpiska sa mga operatiba ang usa ka pakete sa gidudahang shabu nga buy-bust item ug laing upat ka pakete sa gidudahang shabu nga adunay kinatibuk-ang gibug-aton nga 17.5 gramos ug gibanabanaang street value nga ₱119,000, lakip ang buy-bust money.
Ang upat ka mga suspetsado anaa na sa kustodiya sa PDEA Regional Office XI sa Davao City samtang giandam ang mga kasong paglapas sa Sections 5, 6, 7, 11, 12 ug 15, Article II sa Republic Act 9165 o Comprehensive Dangerous Drugs Act of 2002.
